O le amata savalia ai o lenei masina fou o Aperila ua molimauina ai i ata ma faasalalauga mai auala o fesoota’iga a le malo, le asiasia e le minisita o loo iai le vaaia o le poloketi o le miliona, ma sui o le Komiti Faafoe o lea poloketi, nisi o atina’e ua mae’a ona faatino e itumalo faapalota, e pei ona faatonutonu le faafoeina o ia atina’e e sui faipule o ia itumalo o loo tauaveina tofiga ta’ita’ifono mo komiti a Fono Faavae.

E felanulanua’i atina’e a nisi o ia itumalo i Upolu ua mae’a ona asia e aofia ai auala aga’i i uta ua uma ona sua ae lē o faavalitāina.

O fale komiti, ma fale nofo mo nisi o aiga e maualalo le tamaoaiga, o oloa e faatotoga ai laoa ma maota o aiga e pei o nofoa ma laulau, o togiga mo aulakapi, o pāmaa ua sima ua si’omia ai luma maota o nisi o nuu ma afio’aga.

O nisi o nuu ua fesoasoani seleni o le poloketi o le miliona i le una’ia o falelalaga i le faaauau o le toe lalagaina o le iesamoa mao’i, ua fausia pa uaea lelei ua si’o ai lotoā a nisi o a’oga, o meafaigaluega mo le atina’e o faato’aga ma faigafaiva, fausia o alasima ua iai ma fale e faamalumalu ai mai le timu ma le la mo nisi o falea’oga, saunia o kalone lapisi ua faatutū i vaega eseese o nuu ma afio’aga, fausia ai falea’oga mo a’oga faata’ita’i ma le tele o isi atina’e sa molimauina e le minisita ma lana komiti.

A o faagasolo ai lea asiasiga, o le Aso Gafua a sau ua faatulaga e faamatuu ai vaegatupe o le miliona lona tolu mo nisi o itumalo e aofia ai Lotofaga, Gagaifomauga 1, Sagaga 4, Vaa-o-Fonoti, ma itumalo o Faleata 2, Falealili 2, ma Anoamaa 2.