O se tasi lenei o vaega o le polokalame a le Fofoga Fetalai, Adrian Rurawhe ma nisi o sui o le Palemene a Niu Sila lea na malaga ai i nisi o pisinisi e pei ona faasalalauina ai i luga o upega tafailagi.
O le Vaoala Vanilla Farms o se tasi o pisinisi o loo gaosia le vanilla faatasi ai ma nisi o oloa gaosia mai le vanilla lea o loo faatino e se tasi ua iloga foi i le atunuu, Shelley Burich faatasi ai ma le Mailelani Samoa Body Care a Kitiona ma Sylvie Salanoa ma o la alo i le gaosia ai o oloa e faaaogāina ai laau o loo totō i o latou laufanua.
O nisi nei o pisinisi o loo lagolagoina e le Samoa Chamber of Commerce ma le vaega a le Business Link Pacific e pei ona galulue faipaaga ai i se fesoasoani o loo faatupeina e le Matagaluega o le Va i Fafo ma Fefaatauaiga a Niu Sila, ae o loo faamatuu mai e le DT Global mo pisinisi auā le atina’eina.
O le malaga mai a le Malo o Niu Sila ua mae’a ona feiloai atu i le Tamaitai Palemia o le atunuu, Afioga Fiame Naomi Mataafa aemaise o le asia lea o le Maota Fono a le Palemene faatasi ai ma le feiloaiga ma le ofisa o le Hai Komesina a lo latou atunuu i Samoa nei.
