O le faamanatu lea a le Minisita Lagolago o Aoga ma Aganuu Afioga, Agaseata Tanuvasa Valelio Peto i le tatalaina aloaia ai o le fonotaga lona iva o Measina a Samoa i le Iunivesite Aoao o Samoa.
E pei ona iai le manulauti o lenei fonotaga, “Tatala lau mau ina ia malamalama Samoa mo a taeao” na saunoa ai Agaseata ina ia faatāua.
“O le faaolaola ma le faatāua o la tatou measina o se tasi lea o vaega o loo laualuga i fuafuaga a le tatou Malo.
“E ave iai la tatou faamuamua auā o a tatou meatotino.
“E ui ina maitauina le tele o suiga fou ae ia tumau lo tatou mitamitaga i mea o loo fasino ia i tatou.
“O le a tulituliloaina le taunuuga manuia mo lenei faamoemoe ina ia faamauina i se tusi e fai ma molimau ola auā aoaoga a le fanau e tusa ai ma le autu o le fonotaga.”
Na momoli ai le faafetai a le Minisita Lagolago e tusa ai o le tofa ua a’e ma le faautaga loloto ina ia faatino lenei fonotaga.
“Malo le moe manatunatu, o o outou māmā na o manū foi faaifo mai lagi ia sagai ane ‘ai o le tai.”
O folasaga o lenei faamoemoe o le a feagai lea ma nisi o sui o le Iunivesite a le atunuu faapea ai ma sui mai fafo.
O mataupu foi o le a folasia e aofia ai suiga o le tau i Samoa, Faakerisiano ma Aoga, o le nanea o le Gagana, a’oa’oina o taumafa ma taumafa tatau i vasega faavae o le Iunivesite i aafiaga o le Koviti-19, o feagaiga o tala mai le vavau ma isi.
O le a faaauauina lenei fonotaga ma faamae’a ai i le aso a taeao.
