O le faamanatu ai e le Matāgaluega o Tiute o le aso e faatāua ai le latou auaunaga, o se avanoa tāua i le faife’au toeaina faatonu sa ta’ita’i i le sauniga lotu o lea aso, e apoapoa’i ai i le aufaigaluega ma ave iai le fe’au o le tāua o le faamaoni.
O le galuega ua faatino nei e le malo o le faamalosia o le galulue faatasi o auaunaga uma a le malo ma ekalesia ma le pulega a nuu i le tetee atu i fuālaau faasāina, o se logo tatagi leotele i alii ma tama’ita’i o le ofisa o le tiute a o faamanatu iai e le faife’au toeaina, susuga Moli Moli i le tāua o le latou galuega i le leoina o tuaoi o le atunuu o loo ulufale mai ai oloa ae nanā mai ai ma fuālaau faasāina.
Le susuga i le faife’au toeaina Moli Moli i se vaega o lana fe’au faaleagaga i le faamanatuina o le aso o galuega a ofisa o le tiute i Samoa ma le lalolagi atoa.
O le saunoaga a le Minisita o Tiute na faailoa ai nisi o tapenaga a le malo mo le siitia o le auaunaga a le ofisa o le tiute i meafaigaluega faapea ta’ifau sosogi e lua o le a faaopoopo mo le su’eina o fuālaau faasāina.
Le Minisita o le Matāgaluega o Tiute, le tofa Masinalupe Leatuavao Makesi Pisi i se vaega o lana saunoaga i le aso faamanatu faavaomalo o ofisa o le tiute e pei ona faamanatu foi e le Matāgaluega o Tiute a Samoa.
