Ua faailoa e le ta’ita’i o le Itu Agai ma le vaega faaupufai e puipuia aiātatau a tagata i sana tusi i le faatonu poo se Letter to the Editor, e faapea a o tapena le finauga faaletulafono sa o la lu’i ai ma le sui ta’ita’i o lana pati i le Faamasinoga Maualuga le palota a le Fofoga Fetalai i le sa’ilia o le lua vae tolu e pasia ai teuteuga o le faavae o le tausaga 2025, sa tapena mai lea taimi le toe apiliina o se faai’uga e taunuu iai le finagalo o le faamasinoga.
O le Aso Faraile na te’a nei na aumai ai le faai’uga o lea finauga sa finau ai le itu tagi e solitulafono ma soli faavae le palota o le Fofoga Fetalai i le sa’ilia o le 2 vae 3 na pasia ai teuteuga o le faavae e faasino i le toe faatasia o galuega tau faamasinoga i se pulega e tasi.
O ia foi teuteuga sa autū i le soloia ma le aveesea o teuteuga o le faavae na pasia e le Palemene i le tausaga e 2020 lea na tuu eseese ai le pulega o le Faamasinoga o Soligatulafono ma le Faamasinoga o Fanua ma Suafa.
Ua faapea mai le faai’uga a le faamasinoga maualuga e mafai ona palota le Fofoga Fetalai ma ua faamalieina ai le aiaiga o le faavae i le maua o le 2 vae 3 o nofoa e 53 o le Palemene e pasia ai teuteuga o le faavae o le tausaga 2025.
Ua aloa’ia ai foi faaletulafono le faamamaluina o ia teuteuga mai le aso 7 o Aperila o le tausaga nei.
O lea aloa’ia ua aveesea ai le poloaiga lē tumau sa taofia ai le faamamaluina o ia teuteuga se’i su’esu’e ma aumai se faai’uga a le faamasinoga i le lu’i faaletulafono sa tuuina atu e le ta’ita’i ma le sui ta’ita’i o le Itu Agai.
O le faai’uga o le vaiaso na faailoa lautele ai e le Matāgaluega o Faamasinoga ma le Faafoeina o Matāupu tau Faamasinoga le aloa’ia faaletulafono o ia teuteuga i le sainia ai lea e le ta’ita’i o le Malo le afioga i le tamaitai Palemia, afioga Fiame Naomi Mataafa.
E 36 palota na manumālō ai le talia o teuteuga o le faavae ae 16 palota sa teena.
