Ua faamaonia mai e le Auaunaga o le Soifua Mālōlōina, New Zealand’s National Public Health Service (NPHS) le faaopoopo atu o tupe mo le faatino o tuipuipui o le misela, ina ia aofia i latou e lē o ni tagata nofomau ma e lē o ni sitiseni Niu Sila, o loo i totonu o le atunuu i le taimi nei.
O taumafaiga lava ina ia tali atu i le pepesi o le faama’i.
O lona uiga e aofia uma ai tagata galulue i galuega faavaitaimi, Recognised Seasonal Employees (RSE), ma o le a faia o latou tuipuipui o le MMR e aunoa ma se totogi.
O se fuafuaga ua faatino lea ina ia mautinoa, le tuuitiitia ai o le pepesi o le faama’i o le misela i le atunuu, aemaise ia taofiofia le ono oo atu ai i atunuu tuaoi o le Pasefika.
I le taimi nei ua faaopoopo atu se isi tagata i le numera o ē ua aafia i le misela, ma ua oo atu ai lea numera i le 18.
Ae e ui i lea fuainumera, ua faamauina o le to’a sefulufitu, ua faasolosolo manuia, ma ua lē toe iai i se tulaga e ono mafai ona pesia ai se isi mai ia i latou nei.
