E sefulu atunuu o le Pasefika o loo auai ona Sui i le aoaoga e agai tonu lea i le puleaina o vailaau o loo faaaogā i manu faalafuā ma isi e ao ina faatagaina ona faaaogā i le Pasefika lea aofia ai ma Samoa.
I faamatalaga mai le Pacific Community (S.P.C.) o le resitalaina o vailaau nei o le isi lea laasaga tāua lea e faatagaina ai le faatinoina o lenei auaunaga e Pulega o loo feagai ma le vaega nei e faatulafonoina ai poo ā oloa e talafeagai lona faaaogāina ma o vaega e afua ai ona faaaogā.
O le isi itu o lenei aoaoga e mautinoa ai o i latou o le a faaaogāina nei vailaau o loo puipuia lelei lo latou soifua maloloina ae le gata i lea o le siosiomaga.
O lenei faiga sa amata faailoa i le Pasefika e le Faalapotopotoga o Taumafa ma Faatoaga a le Lalolagi le Food Agriculture Organization i le Pasefika.
O loo faafoeina lenei aoaoga e le S.P.C. ma le lagolagosua a le Iuni a Europa i le Pasefika.
O loo ua faamatuu ma masini laptops mo sui taitasi mai le Pasefika o loo auai i lenei aoaoga ina ia fesoasoani i faamaumauga ma suesuega e patino i lenei vaega o le aoaoga.
O lenei aoaoga o loo faatautaia i Fiti mo le vaiaso atoa.
