Ua faailoa le anoanoai o mataupu o le a soalaupule ma liliu iai le tofa a Faamasino Sili o le Pasefika i la latou fonotaga lea o loo usuia mai i Samoa i le vaiaso nei.
Na faailoa e le afioga i le Faamasino Sili a Samoa ia Satiu Simativa Perese, o mataupu e faatatau i sauaga i totonu o aiga, o aafiaga i tagata lautele ma suiga o le tau, o nisi o mataupu o le a oo iai galuega a lea fonotaga.
Na ia faailoa foi o loo iai foi ma mataupu e faatatau i faafitauli o loo feagai ai ma Faamasinoga e lē gata i Samoa ae o isi atunuu e 15 o le Pasefika.
O le faamasinoga lava ia a Samoa na ia faailoa faafitauli e tatau ona foia e iai le aafiaga o faaiuga a le Faamasinoga, o le lē lava o le aufaigaluega ma mea e faatino ai galuega faapea ai la nisi o tulafono ua tatau ona suia.
O le fonotaga i le tausaga nei ua vaaia ai le auai mai o Faamasino Sili o le Faamasinoga Maualuga a Ausetalia, na ta’ua e Satiu o se tulaga lelei lea ma se fiafiaga ua maua le avanoa e faasoa mai ai le tomai i mataupu tau le Faamasinoga.
E tolu aso o le a usuia ai lenei fono, o nisi vaega o le polokalame o loo talosagaina lea sa agai ai i le afioaga o Amaile e molimauina le saofaiga a le pule a alii ma faipule ia latou fonotaga i nuu ma afioaga, atoa ai ma le faatinoga o le ifoga.
