E oo mai lava i le asō o loo iai pea se nunumi ma le lē mautonu o le to’atele i faiga totogi faaopoopo poo tariffs a le Peresetene o Amerika o loo faatulaga i luga o oloa e auina atu i lona atunuu.
O lipoti aupito lata mai ua ta’ua ai ua siitia e Trump le totogi o tiute i oloa auina atu mai Saina, e aofia ai u’amea ma alumini, faatasi ai ma oloa mai Kanata ma Mexico, o le vaiaso nei foi ua faatulaga e faamamalu ai le siitia o totogi o levies mo taavale.
O loo lipotia le faatalitali o le to’atele poo le ā tonu le faatulagana o ia lafoga totogi faaopoopo ma le aga’i i luma i tulaga tau fefaataua’iga.
Fai mai ua faaigoa e le Fale Pa’epa’e le aso e faalauiloa auiliili mai ai ia tulaga, o le Liberation Day ma o le a faamanino auiliili ai tulaga o ia totogi faaopoopo i luga o oloa ma isi faiga faavae ua leva ona galulue ai le pulega o le faigamalo a Trump.
E eseese finagalo faaalia o tagata i lenei mataupu aemaise o loo faatalitali mai foi iai atunuu i fafo i Europa ma isi vaega o le lalolagi e auina ane a latou oloa i Amerika.
E iai foi nisi atamamai i mataupu faapea e manatu e sili atu ona tele aafiaga lē lelei mo Amerika i le faatinoina o ia ituaiga gaioiga nai lo ni penefiti e ono maua e pei ona folafola e Trump a o le’i faia le faigapalota.
Puna o Faamatalaga: https://www.bbc.com/news/articles/c0m90jjewd7o
