O le afiafi o le Aso Lulu o lenei vaiaso na molimauina ai e le to’atele ma le Peresetene filifilia o Amerika le faatautoina o le tamaitai Samoa o Tulsi Gabbard ua faamaonia ai le avea ma Faatonu Sili o se tasi o vaega tāua i le atunuu, le National Intelligence.
I le faatasiga na saunoa le alii Peresetene o Donald Trump ma ia folasia ai le tele o galuega sa galue ma faatino e Tulsi i lona soifua auauna i le malo ma le atunuu.
Na faailoa e Trump, o se tasi lea o sui na tu malosi e lagolago o ia i le tele ai o tala fela’ua’i ma le tele o tala fafau sa feagai ma ia a o fetaia’i ai ma le anoanoa’i o faaitauli i ana taumafaiga; ma na faafetaia ai e Trump le tamaitai o Tulsi ona o lona tula’i mai ma le lagolagosua na ia faaalia mo ia.
Sa folasia e Trump le tele o vaega o le a agatonu iai le galue ma le tautua a le Faatonu Sili filifilia ma o lona naunauta’iga ia tumau ai le galue faamaoni i le tofiga ua umia nei.
I le mae’a ai o le folasaga a le alii Peresetene, na faataunuuina ai loa le faatautoina aloa’ia o le tamaitai o Tulsi Gabbard.
I le avea ai o lea alo Samoa ma Faatonu Sili o le National Intelligence, o le a i lalo o lana vaavaaiga lālā e 18 o lea galuega tele e aofia ai le CIA, FBI ma le National Security Agency poo le NSA, ma o le a ia vaaia foi le silia ma le 700 piliona tālā Amerika i le faatautaiga o le auaunaga.
I talaaga i le olaga galue o Tulsi Gabbard, sa avea o ia o se sui o le vaega faaupufai o le Republican, o se tasi na maualuga lona tofiga i le Vaega’au a Amerika le US Army Reserve i le tausaga e 2021, ma o sē na avea ma sui o le malo o Amerika i Hawai’i mai le tausaga e 2013-2021.
A o avea ai lea alo o Samoa ma sui o le Hawaii Army National Guard, na maua le avanoa e malaga ese atu ai mo le malo o Iraq mo galuega i le tausaga 2004-2005.
O loo faamauina lona galue ai i le vaega tau i le soifua mālōlōina poo le medical unit ma ia taulimaina ai se pine ua ta’ua o le Combat Medical Badge mo lana tautua.
I le tausaga 2007 na mae’a ai nisi o ana a’oaoga i le aoga faamiliteri o Alabama.
Na galuega o ia i Kuwait mai le tausaga e 2008-2009 o se tasi o ta’ita’i o le vaega ua faaigoaina o le Army Military Police.
A o avea ai foi Tulsi ma ta’ita’i o Hawaii poo le Congress, na seei mai ai le tamaitai i le tulaga o le Major i le Hawaii Army National Guard.
O le tausaga 2020 na aga’i ai le tamaitai o Tulsi i le US Army Reserve ma faamanuiaina ai i le tulaga maualuga o le Lieutenant Colonel i le tausaga e 2021.
Na soifua mai o ia i Leloaloa, Maʻopūtasi County i Amerika Samoa, peitai na malaga ese mai o ia ma lona aiga mai Tutuila ma faamautū i Hawaii e pei ona ola ma tupu a’e ai.
O lona tuaa tinā o le Siamani Europa, ae o lona tuaa tamā o le Samoa Europa.
O Tulsi o se tasi o le fanau e to’alima a Gerald Michael Gabbard ma Carol Porter Gabbard.
Puna o Faamatalaga: https://www.bbc.com/news/articles/cqjvk0jx15zo?fbclid=IwY2xjawIaPfdleHRuA2FlbQIxMAABHeXGi6qRamAVzexze4q9WdAEejfpCrbkb0zIJprES7-Mp6aRIfug9d_eKQ_aem_ijzX49JdwEURWInGsnFYYg
