E lei taliaina e faiaoga le ofo mai le matagaluega o aoga, ma o le a faataunuuina pea lava solo tetee ua mae’a faatulaga lea e amata faasolo mai le asō.
E ui o lea na toe aumai le isi ofo a le matagaluega o aoga e faatatau i totogi o faiaoga, ae fai mai le Post Primary Teacher’s Association poo le PPTA, e le taitai ona lava pe a faatusa i le alu i luga o le tau o le soifuaga.
Fai mai le sui o le asosi o lea lava na manino faamatalaga na fai agai i le matagaluega ina ua amata mai feutanaiga ma talanoaga o totogi o faiaoga i le latalata i le tausaga talu ai, e moomia le sii o totogi ia faafetaia’ia ai le tau o le soifuaga peitai e sau le isi ofo e misi foi.
O tetee auaua’i a faiaoga i le vaiaso nei o loo amata mai le South Island i le asō, o le aso a taeao faapea ai ma le Aso Tofi lea e faatini e Aukilani ma Northland.
E ese mai i tetee o loo faia auaua’i i le vaiaso nei o lea foi ua iai le isi fuafuaga, e uma auaua’i aai ma nuu, ae faasolo i vasega eseese i totonu o aoga maualuluga mai le Vasega 9 agai i le Vasega 13.
Ua maua e tala fou e le o faigofie i mātua aemaise ai lava fanau aoga ona o le tele o aso misi e aooga ai i totonu o potuaoga.
Ua fai mai ai le matagaluega o aoga, o se faanoanoaga tele le aafia o aoga a fanau ona o le fefaloa’i o le iuni ma le malo i totogi, ma o lea foi na faatalosaga le matagaluega i faiaoga ia taofia le tetee ua amatalia i le asō.
E silia ma le 20,000 faiaoga o aoga maualuluga o loo auai i tetee o le vaiaso nei.
