Ua amata i le Aso Lua o lenei vaiaso ona soalaupule e sui usufono o le paeaiga lona 17 a le Palemene, le tala faatatau autu o le tupe fou o le taimi muamua ua ausia ai le aofaiga e silia i le tasi le piliona tala.
O saunoaga faalauaitele a sui faipule o le a fesiligia ai le fuafuaga o tupe faaalu a le Malo mo le isi tausaga faaletupe, ma fesiligia ai foi poo sagatonu le faaaogaina o seleni a le atunuu.
O saunoaga faalauaitele foi o le a faailoa ai ni atina’e a itumalo faapalota o loo manaomia le fia faaleleia, aemaise o talosaga masani lava o auala galue, le suavai taumafa, o taligalu, ma polokalame o le atina’e o nuu o itumalo ua laveia lelei i le polokalame o le tasi le miliona tala.
E 47 itumalo ua mautu lelei fausaga o a latou fuafuaga e faaaoga ai a latou tai miliona, ae 4 itumalo palota e lei mautu a latou fuafuaga lea o loo iai le talitonuga e tatau ona mautu i le faaiuga o le masina nei e mae’a ai le tausaga faaletupe o loo faagasolo.
