E ese mai lea mataupu, o lea ua faagasolo ona suesue molimau o le tagi tau palota a le itumalo o Vaimauga 3 lea na amata i le Aso Lua o lenei vaiaso.
O loo tuuaia i lea faamasinoga tau palota le sui faipule o lea itumalo i se gaioiga faaalatua e fesootai i le faalauiloa a le pati faaupufai o le Faatuatua i le Atua Samoa ua Tasi na faia i le afioaga o Magiagi i le Aso Faraile 17 o Fepuari na tuuina atu ai taumafa ma se tinoitupe e lima afe tala i le faamoemoe e faatosina ai le filifiliga a tagata palota.
Ua faamoemoe a mae’a ona suesue molimau a le itu tagi ma molimau tali a le itu a le sui faipule o loo tuuaia, ona amata lea ona suesue molimau o moliaga a le sui faipule o faiga faaalatua i le ave o le tai selau tala i ni tagata palota se toalua o Vaimauga 3, lea o loo tuuaia ai le tofa Lealailepule Rimoni Aiafi.
O le isi moliaga a le sui faipule le afioga Lautimuia Uelese Vaai, o le lima selau tala na ave i le savali o tagata palota o le itumalo na latou momoli i le vaega faaupufai e puipuia aiātatau a tagata lo latou sui faatu le afioga Samau Leatigagaeono Solitamalii Timani.
E fā aso o loo tagofia ai e le faamasinoga o palota lenei mataupu.
