Ua faasolo nei le iloiloga a le faamasinoga e iloa ai le lautele ma se faataotoga o suesuega a le faamasinoga i le pogai o le fano o le ola o le alii sa faia se osofaiga faatupu faalavelave i le nofoaga a le Lynn Mall i Aukilani i Sisifo i le silia ma le lua tausaga talu ai.
O Ahamed Samsudeen, sa fana e se leoleo ofu savili ma fano ai le ola a o ia tatui nisi o tagata faatau i le supamaketi ia Setema 2021, ae faatoa mae’a lava ona tatala i tua mai le falepuipui.
O le alii faapitoa e suesueina maliu lilo (coroner) o Marcus Elliott o loo gafa ma le iloiloga o lea mataupu mo le lua ma le ‘afa aso i Aukilani.
O le a ia iloiloina iuga sa iai suesuega a ofisa e lima ma faaiuga a faamasinoga, ma faalogologo i talosaga mai ia i latou sa faasaoina mai lea osofaiga, leoleo, matagaluega o femalagaa’iga, matagaluega o falepuipui ma sui o le aiga o Samsudeen.
E toalima tina ma tamaitai ma se alii e toatasi sa faaoo manu’a iai Samsudeen i se agaese i lea osoaiga i le supamaketi a le Countdown.
O Samsudeen sa mataituina talu mai le 2015, talu ai o lona tosina tele i le faalapotopotoga faatupu faalavelave a le Islamic State, ma pueina ai i le malaevaalele i Aukilani i le 2017.
Sa talitonu pulega, o se tagata e faamata’u i le saogalemu o le atunuu, ma sa taumafai e auai atu i lea faalapotopotoga a le ISIS i Syria.
Sa lipotia ai o le tausaga i luma atu a o lei pueina sa malaga ai Samsudeen i Samoa mo se tafaoga, e pei ona iai le masalosaloga o pulega i Niu Sila, o sana aitia e faataitai ai pe taofia o ia i le malaevaalele.
