O suiga fou i totonu o le pulega o le asosi o le taaloga lakapi liki i Samoa, e pei ona mae’a filifilia sona Peresetene ma isi tulaga tofi, ua agai atu nei i le isi laasaga tāua, o le saili o se Faiaoga fou o le aulakapi liki a le atunuu le Toa Samoa, ina ua mae’a faalauiloa ai le faamavae o le faiaoga sa ia tauina le taua ma faatietie le lakapi liki a Samoa i le tumutumu o le taamilosaga o le Ipu o le Lalolagi i le tausaga na tea nei, le susuga Matt Parish ua faaee iai le suafa matai o Mau a Pule.

Ua faailoa e le Lakapi Liki a Samoa i se pepa o faamatalaga o le tuanai ai o le ipu o le lalolagi na sao ai Samoa i le sailiga o le siamupini, ma le galuega fita na feagai ma nisi o tamalii o le atunuu sa faamaopoopoina ma unai le atina’e o le taaloga e pei o lē sa avea ma peresetene, o ula ia mo le laulau fou ua filifilia, ae o se luitau foi lea mo le agai i luma o le lakapi liki ilo tatou atunuu.

O le fono faaletausaga ia Iulai na filifilia ai le laulau fou mai le tofi peresetene lea ua seei mai ai le susuga Fiu Faaolatane Ponifasio Vasa, sui peresetene o Toilolo Klaus Stunzner, Failautisi o Laulu Lafao Leauanae Tuugatiti Leo Leauanae ma le teuoloa o Tavui Mike Lemisio.

O lē sa avea ma peresetene mo le 12 tausaga le afioga Tagaloa Faafouina Su’a e lei finagalo e toe ave lona suafa i le filifiliga.

E faapena foi Tuimatafele Fritz Tuiavii sa failautusi ua filifilia e taitaia le ‘au masii i taaloga a le Olimipeka i le tausaga fou.

O Fiaai Peter Paul sa sui peresetene e lei toe finagalo foi e auai i le filifiliga o sui o le komiti faafoe.

Ua faamoemoe le Lakapi Liki a Samoa o le a faalauiloa mai i se taimi e lē o toe mamao nisi o fuafuaga ma tapenaga a le Toa Samoa e le gata i le Ipu o le Lalolagi i le tausaga fou, ae faapea foi i le taamilosaga ua faailoa i luga o upega tafailagi, o le a faia ai ni taaloga i le va o Ausetalia, Niu Sila ma le tatou Toa Samoa.