O le Aso Tofi o le vaiaso nei ua amata tapena ai le uta muamua o taga talo mata e ave atu mo maketi i Niu Sila i luga o vaalele, ae ua le o vaa oloa o le sami lea e lua i le tolu vaiaso faatoa taunuu.
O le susuga Seuamuli Kome Robbie Lauano, o se faifaatoaga i Samoa ae faamautu foi nisi o ana pisinisi i Niu Sila, ua ia tapena lea uluai uta i lona naunautaiga, ia maua e o tatou tagata le talo o loo felesi ma lelei atoatoa.
O se taumafaiga lenei ua faafiafiaina ai le Minisita ma le Matagaluega o Faatoaga i Samoa, ona o se taimi muamua o le a ave ai i le vaalele se uta o lea laau tau faatoaga o le matai’ai a lo tatou atunuu mo maketi i Niu Sila, ma le faamoemoe e faatino foi mo Ausetalia, ma le agai i Amerika.
O le Aso Faraile o le vaiaso nei ua faatulaga e ave ai lea uta muamua i le vaalele.
Se faatalatalanoaga ma le susuga Seuamuli Kome Robbie Lauano, o le uluai faifaatoaga talo ua na ave uta o talo mata mai Samoa i le vaalele.
