O le taeao o le Aso Gafua na amatalia ai nisi o polokalame faataatitia o le Fono a Malo o le Taupulega, e pei ona aofia ai se sauniga aloa’ia o le Sulu o Suiga Lelei, poo le Torch of Change i lona autū “Let it End with Me”.

O lenei polokalame tāua o loo faatautaia e le faalapotopotoga o le Toomaga mo ē Puapuagatia le Samoa Victim Support Group (SVSG).

Ma na molimauina e le to’atele o sui mamalu o le Kapeneta ma mālō faaaloalogia o loo auai i le fonotaga i lenei vaiaso.  

O le vaa o le Gaualofa na faafeaoa le sulu ae na molimoli mai e le paopao le sulu, ae na tauaaoina mai e le Tausala o le Pasefika, Moemoana Safato’a Schwenke le sulu.  

O le susuga i le faafeagaiga ia Alesana Palamo na ta’ita’iina le faatasiga ma na ia faamafafaina ai le autū: “Toe Atia’e” o le meaalofa mai le Atua, ae o se faamanatu a le faafeagaiga e omai faatasi e toe atia’e atunuu o le taupulega ma ia manuia ai tagata uma; Ia fotua’i se taeao fou mai lenei lalolagi faigatā. 

Na lagiina e le Aoga Aso Sa a le afio’aga o Safato’a Lefaga le pese amata o le sauniga faapitoa.  

O lenei Sulu o Suiga Lelei o se polokalame faalauiloa ma galuega faatino a le faalapotopotoga e Puapuagatia e manatua ai le tamaita’i o Sanarosa na maliu ona o tulaga na aafia ai i sauāga.

Ma o le naunauta’iga o le saga faamautūina o tulaga i le puipuia ma le saogalemu o fanau i totonu o aiga mai sauāga e ono aafia ai lo latou ola tuputupu a’e.  

O le saunoaga autū na saunoa iai le tamaita’i Palemia, le afioga ia Fiame Dr Naomi Mataafa.

Ma na ta’ua ai le telē o le tāua o le omai faatasitasi o sui o malo o le taupulega e faalogologo ma faasoa i auala e tapu’e ai ola o tupulaga ma fanau lalovaoa.  

Na faapena foi ona faasoa le tamaita’i Tausala o le Pasefika, Moemoana i itu o loo moomia ai le galulue faatasi e puipuia ai le siosiomaga ma laufanua o atunuu o le Pasefika faapei o Samoa mo fanau a taeao, e pei ona iai le tusi ua mae’a saunia ua faaigoaina o le “Children’s Voices” e pei ona faasoa ai foi se tasi o alo o le atunuu ia Aria, le moomia o le tutū faatasi e puipui ma faatumauina le faamatagofieina o atunuu o le taupulega mo se lumanai manuia.  

O le faasolo le sulu e ala i se savali poo se parade e aga’i atu i le nofoaga e faatino ai fonotaga a tupulaga o malo o le taupulega.