E foliga mai ua amata malosi le Palemia fou ma le faigamalo a le Leipa ia latou fuafuaga talu ona mae’a le palota i le faaiuga o le vaiaso talu ai ma le faatautoina o le Palemia fou Anthony Albanese.

O ia le Palemia lona 31 ua iai nei o Ausetalia ae o lana uluai feiloaiga ma le aufaasalalau ma tusitala na alia’e ai se tasi o suiga ua o latou faatinoina o le faaopopo lea o le fu’a, Aboriginal and Torres Strait Islander i talaane o le fua a Ausetalia.
O le faaiuga foi o le palota ua vaaia ai le toe sailia o se isi taitai fou o le vaega faaupufai a le Liberal e sui tulaga ia Scott Morrison sa avea ma Palemia. O Peter Dutton lea o loo fetāuaina e ono filifilia.

O le minisita o le va i fafo ua iai nei, Penny Wong ua malaga atu ma le Palemia fou i Iapani mo le fonotaga a le Quad, lea e aofia ai le malo tele o Amerika, Initia ma Iapani.
Fai mai Wong o le malaga atu i le fonotaga lea i le vaiaso muamua talu ona tulai mai o le faamaoniga lea o le tāua tele o le faiga faapaaga lea a Ausetalia ma ia atunuu auā le puipuiga ma o le a faapea foi ona o latou faatalanoaina le mataupu i suiga o le tau.

O le iuga o le palota Liberal ma le National 55 nofoa, ALP, Vaega faaupufai a le Leipa 74, o isi nofoa e 15 ma ua 72.9 pasene o palota, postal votes ua mae’a ona faitauina mo se faaiuga faaiu.
Fai mai Albanese e manao e feiloai le kapeneta i ni nai vaiaso o lumanai nei a o ia faatulaga le faagasologa o fuafuaga ma e manatu e tatau ona feiloai ae lei mae’a le masina o Iulai.