O le asō lea na amata ai le vae o le taamilosaga taitoafitu le HSBC Sevens lea e talimalo ai Sini i le faaiuga o lenei vaiaso.
O le taimi nei o loo tulaga 5 Samoa i le faatulagana o ‘au talu ona mae’a mai le vae o le taamilosaga i Hamilton i le vaiaso talu ai. O Niu Sila o loo sili i le taimi nei i togi e 63, tulaga lua ai Amerika, 3 Argentina, 4 Aferika ae tulaga 5 ai Samoa.
O loo sili foi le ‘au a tamaitai Niu Sila i le taamilosaga a tamaitai i togi e 58, tulaga lua Ausetalia, tulaga tolu Amerika.
O le Pulu C o loo iai Samoa, Spain, Amerika ma Aialani ae o Niu Sila o loo i le Pulu B faatasi ma Aferika, Kenya ma Uruguay.
E tolu aso o le taamilosaga ona agai ai foi lea i le isi vae o le taamilosaga i Los Angeles i Amerika.
Talosia ia le alofaiva o si a tatou ‘au i le taamilosaga lea i Sini ma isi vae o le taamilosaga o loo totoe mo le 2023.
