O lea ua amatalia galuega a le ‘au māulu a le kamupani o loo faia galuega i le ogasami o loo goto ai le manuao o le Manawanui, e la’u ese a’upega e pei o laau malosi ma pusa ututau mai le vaa.
O le matāgaluega o leoleo, falepuipui ma le toe fuata’ina o loo galulue ma sui o le fitafita o le puipuiga a Niu Sila i le faamautinoa ia saogalemu tulaga uma i le aveesea mai o ia a’upega ma tuuina atu i se nofoaga malu e teu ai.
O le tala lata mai lea i le ofisa sinia o le vaega o le fitafita o le puipuiga a Niu Sila o Commodore Andrew Brown i se pepa o faamatalaga.
Faaalia e lea ofisa sinia o le laasia ai o lea vaega o galuega mo le aveesea o ia a’upega i le mae’a ona aveese suāuu ma vai leaga mai le manuao, ua silasila ai nei le malo o Niu Sila e feutaga’i ma le malo o Samoa i le isi laasaga e faatino.
O le laasaga lea i le tuu ai pea o le vaa i le ogasami o loo goto ai pe aveesea, pe a mae’a ona faatino galuega mo le puipuiamalu o le gataifale mai ni aafiaga e lamatia ai le si’osi’omaga aemaise o le ola lelei o i’a ma figota faapea ‘amu o le sami ma isi meaola o le gataifale.
O le isi lea o fuafuaga o le a feutaga’i ai malo o Niu Sila ma Samoa pe a mae’a tuuina atu se lipoti i le mae’a ai o galuega o loo faatino i le taimi nei.
