Ua amata le tausaga fou i le faamamalu o teuteuga fou o tulafono e faagaioia ai le taaloga o le ponesi lea e fiafia le to’atele e taaalo ai.

O ni teuteuga ua faailoa e le pulega o taaloga o petipetiga a Samoa na mafai ona fausia i le mae’a o ni faatalatalanoaga na faia i Upolu ma Savaii i le aso 10 ma le aso 12 o Tesema o le tausaga ua mae’a atu.

Ua faamamafa i lea tulafono le matuā tatau ona talosaga se laisene mo le faia o le ponesi ma ia faagaioia mai foi i le nofoaga ua i totonu o le laisene, ma ua tapu ma faasā ai ona toe fai ni totogi o ni tagata e galulue i le faia o le ponesi.

O se tasi foi o aiaiga ua lē tatau foi ona toe faagaioia se ponesi i se tulaga faapisinisi.

Ua faasā ona toe taaalo ni tagata e 21 tausaga ma lalo ifo, ma ua sā foi ona toe faaaogā ni tagata e 21 tausaga ma lalo ifo e fesoasoani i le faagaioia o le taaloga.

Ua aiaia mai foi i ia tulafono le tau o le numela e faatau ai e $5 tālā, o le manumalo e $125 tālā, tupe mamā mo lē o faagaioia le laisene ponesi e $50 tālā.

Ua iai foi le aiaiga o ia tulafono e tatau ona maua le manumalo i le aso ma le taimi e maua ai le numela o le ponesi ma ia lē silia i le 24 itula.

O se tasi lea o mafua’aga sa vevesi ai tagata taaalo ma nisi o le aufaiponesi ona e se’i numela o le Lotto i le afiafi o le Aso Toonai sau ai ma le ponesi, ae o le manumalo e faato’ā maua i le isi aso, poo le isi vaiaso e sosoo ai ma le fiu e tulituli ua lē maua, pe maua foi ae na o se vaega o le seleni o le manumalo.

Ua matuā tapu ma faasā ona toe faaaogā soo se auala faatekonolosi e momoli ai le tupe o le manumalo.

O lona uiga ia tuu sa’o i le aao o le tagata ua manumalo lana seleni.

O le Aso Lulu le aso muamua o Ianuari o lenei tausaga fou 2025 na amata faamamalu ai ia teuteuga o tulafono o le taaloga ponesi.

O lona uiga o le se’i muamua o le Lotto i le Aso Toonai o lenei vaiaso e tatau ona usita’ia e le aufaiponesi teuteuga fou o le tulafono o lea taaloga fai tupe.