Ua faamanuiaina le Kolisi o Papauta i se faamamāavega i tupe faaalu e faatau a’i le kesi e ola ai ogaumu ina ua maea ma amata faaaoga se tasi o taumafaiga tau i le atinae malosi faafouina i le faatu ai o se polōketi ua faaigoaina o le Biogas System.
O se atinae ua faaaoga ai otaota o tagata ma manu (sei tulou )faapea laau e gaosi ai le kesi mo ogaumu e ga sese ai taumafa a tamaitai o le Kolisi aemaise foi le vasega o faiaoga.
O se tasi lenei o taumafaiga o loo Tuala ua ai le Matagaluega o Punaoa Faalenatura ma le Siosiomaga e pei ona faatutū ai nisi o taumafaiga faapenei i nisi o nuu ma afioaga i Upolu faapea ma Savaii.
O le tatalaina o le atinae Biogas mo le Kolisi o Papauta na saunoa ai le Minisita Lagolago o le MNRE ia Faleomavaega Titimaea Tafua ma ia faailoa o se taumafaiga o le a faasaoina ai le seleni i le faatauina o kesi mo le gaseseina o mea taumafa a le au nofo tumau ma fanau aoga ae o le a mafai ai foi ona maua ai galuega a nisi o tagata i le aoina mai lea o otaota e fafaga a’i le biogas.
Na ia taua foi o le a matuā aoga tele le atinae aua fanau ma tupulaga lalovaoa a le EFKS o le a latou iloa ai ia metotia ma tekonolosi e faaaoga iai otaota lafoai. O le atinae sa fausia e le konekarate o le Bio Energy Solution Technology i le tau aoga e $100,000 tala na faatupeina lea i le fesoasoani a le Faalapotopotoga o le Siosiomaga o le Lalolagi faapea le UNDP.
Ua faailoa e le Minisita Lagolago ua maea ona faatino se aoaoga mo i latou e vaaia le atinae i le naunautaiga ia faasoa atu lea aoga o le tomai i tagata Samoa aua le agai i luma o le atinae o le biogas.
