E 17 mita le umi o le vaaleoleo fou ua faaigoa i le tamaitai o Tilafaiga, ae tasi le miliona lima selau afe tala lona tau o se foai a le Malo o Iapani na amata tapena ma faatino feuiuiaiga e fausia ai le vaa ia Iulai o le tausaga na tea nei.

E pei ona silafia o le iai o se fuafuaga a lea Malo e aumai se vaaleoleo mo le leoina o le gataifale ma ogasami faatulafonoina o Samoa, na mafua ina ua faaleagaina le vaaleoleo o le Nafanua 2 lea na oso i le aau ia Aokuso o le tausaga e 2021.

O le amataga o lenei vaiaso na tauaao atu ai e le amepasa o Iapani i Samoa le foai a lona malo i le tamaitai Palemia ma le Malo o Samoa.

O se taimi talafeagai ua taunuu ai le vaaleoleo o le Tilafaiga auā galuega masani o le leoina o o tatou ogasami, a o tālia ai se taimi o le tausaga fou e taunuu ai le isi vaaleoleo i le fesoasoani a le malo o Ausetalia.

O le vaa lea e sui ai le Nafanua II e 30 miliona le tau na fausia ai, ae e lei tele ni tausaga na faaaoga ai ae toe faafoi ua faaletonu.

O le foai a Iapani ua avea ma pine faamau e faailoga ai le atoa o le 50 tausaga o le faiga paaga a Samoa ma lea Malo.

O Iapani foi sa fausia ma aumai ai nisi o o tatou vaa la’upasese o loo faaaoga i malaga i le va o Upolu ma Savaii faapea malaga i le va o Apia ma Pago Pago.