E faitau afe kalone lapisi i Aukilani o loo iai i nofoaga faitele o le a lē toe iai.
O se tasi o suiga o lea ua amata faia nei e le Auckland Council a o iai pea i suiga e faaitiitia ai ana tupe faaalu.
I faamaoniga mai le sui o le pulega a le Council a Aukilani o loo iai le faamoemoega ia uma ane le masina o Mati ua aveese le tusa ma le 30% o le 10,000 kalone lapisi o loo iai nei.
E tusa ma le $9.5 miliona i totonu o le valu tausaga o i luma e sau mai le suiga lenei.
I le fesiligia ai la poo ā kalone lapisi o le a aveese ae o ā kalone lapisi e faatumau pea, ae ua fai mai ai foi o loo taulai lenei suiga i kalone lapisi o loo i nofoaga e lē pisi pe o loo felata’i ma isi kalone.
O kalone lapisi e aveese ae ua faaleagaina o le a lafoai i le lapisi, ae o isi uma o loo lelei pea o le a auina atu i isi atinae fou a le Council o loo faia nei pe suia ai foi isi lapisi ua faaleagaina.
