Ua amata aloaia nei tiute tauave o le afioga i le Komesina Maualuga filifilia o Samoa i Niu Sila mo le umi e 3 tausaga, ma faamuta aloaia ai foi le taimi galue o lē a sa tauaveina lea tofiga.
O le afioga Afamasaga Faamatalaupu Toleafoa na tuuina atu ona tusi tofiga i le tamaitai Kovana Sili o Niu Sila i le Aso Lua o le vaiaso nei i se sauniga na auai ma le Komesula Aoao fifilia fou o Samoa i le aai o Aukilani le afioga Afemata Palusalue Faapo II.
Ua faailoa i se pepa faalauiloa o le tauaaoina o tusi tofiga o le Komesina Maualuga o Samoa i Aotearoa, le faafetaia o taitai o le Malo o Samoa e le Kovana Sili le afioga Dame Cindy Kiro, ona o le taligamalo a le atunuu ina ua asiasi mai i le taualuga o polokalame o le 60 tausaga o le Tutoatasi faapea le faamanatuina o le 61 tausaga o le malo tutotasi ia Iuni o le tausaga nei.
O le afioga Afamasaga Faamatalaupu Toleafoa sa avea foi ma sui o Samoa i le tofiga Amepasa mo Malo Europa faapea foi ona avea ma Konesula Aoao o Samoa i Aukilani i ni tausaga ua mavae.
