O le faatumauina o le tausia o le filemu o le autu lea o le savali a le matagaluega o leoleo ma le toe fuataina na feiloai atu ai i matai poo alii ma faipule o le afioaga o Leauvaa, a o salalau ai i luga o upega tafailagi ma auaunaga faasalalau eseese i le atunuu, tala o ni vesiga i nisi o tupulaga o le nuu o Afega ma Leauvaa.

O le faailoaina e le matagaluega o leoleo o lea feiloaiga i le Aso Tofi nei, e lē o aumai ai se tala pe o faia se suesuega i lipoti ua ta’ua ai, le fasi sese o se taulealea o Leauvaa e ni tupulaga o Afega lea o loo laumanuia ai i ia lipoti na tupu lea tulaga ae o loo iai leoleo mo le latou tiute o le puipuiga ma le leoina o le filemu a o faatino le galuega a le nuu o Afega o le suaina o le auala i le tuaoi o o latou eleele lea ua nofoia faamalosi e nisi o aiga o Leauvaa.

Faaalia i le faasalalauga a le matagaluega o lea feiloaiga sa autu i le iuga a le faamasinoga o fanua ma suafa ma vevesi i le va o nisi o tupulaga o afioaga e lua o Afega ma Leauvaa.

O loo faaalia e le sui komesina o leoleo le susuga Papalii Monalisa Tia’i Keti i se lipoti a le nusipepa o le Samoa Observer e ese le tala na oo atu i leoleo e tusa ai o le mataupu i le vevesi na fasi sese ai se taulealea o Leauvaa.

Faaalia e le sui Komesina i lea lipoti o le tala a leoleo o le auuso tama o le nuu o Leauvaa sa onanā i le avamalosi ma taua’i fusu ai ae e lei aafia se tupulaga tama o Afega.

O le faamatalaga a le sui komesina i le nusipepa e matuā eseese mamao ma lipoti a le tusitala o le Samoa Global na faatalanoaina le taulealea i Leauvaa na aafia i le faaoolima.

O loo ta’ua e Maranata Simone i lea auaunaga tau faasalalau, o ia na fasi ina ua lē maua atu e le tuliloa a ni taulelea o Afega lona uso sa latou tauupu.

Ua faaalia e le matagaluega o leoleo falepuipui ma le toe fuataina i le latou faasalalauga, ua talia e Leauvaa le latou savali o le tausia o le filemu.