Ua faailoa mai e le malo suiga fou e uuna’ia ai tagata i galuega, ma o lea foi na aloa’ia ai lava ananafi nisi o suiga nei.
O le aso ananafi na fofoga mai ai e le Palemia, Christopher Luxon faapea le Minisita o le Social Development, Louise Upston aiaiga faaopoopo mo i latou o loo mauaina le penefiti o le Jobseeker, ma o le suiga ua aloa’ia nei o le faaaogā lea o le traffic light system lea e faatulaga ai tagata o loo mauaina lea penefiti.
O le traffic light system o se faiga e faatulaga ai le faamalieina o aiaiga a o saili galuega le tagata o loo mauaina le penefiti, ma o le lē usitaia o aiaiga o loo sau ma le penefiti o le a faasolosolo ai lava i le lanu samasama seia oo i le lanu mūmū lea e faasala ai loa ma lē toe agavaa.
O se faiga ua saunoa le minisita ia Upston o le a manino lelei ai sitepu e tatau ona faamalieina e le tagata o loo mauaina le penefiti o le Jobseeker a o sa’ili galuega ai.
O le vaega lona lua, o lea e faatali le pasia o le tulafono ma amata aloa’ia ai loa i le amataga o le tausaga fou, ma o suiga, e ta’iono masina ma toe faatalosaga le penefiti o le Jobseeker; e tatau ona iai se jobseeker profile a le tagata o loo talosaga mo penefiti a o faatalosaga, ma o le lona tolu o le oo atu lea i le lua tausaga le umi e pipii ai pea i le faila o le tagata na lē usitaia ta’iala a o tala le penefiti.
Sa saunoa le Palemia e lē fetaui le tala o le Jobseeker ae o lea e lē manao e savalia aiaiga o loo maua ai lea penefiti, ma e lē o ni faiga tutusa ia pe a faatusa i tagata o loo usu e galulue ma totogi lafoga.
Ae mai le minisita o le matagaluega lea o loo gafa ma lenei pitolaau o le totogiina o penefiti, o se faiga o le a uuna’ia ai tagata i galuega ma faaopoopo le isi mamafa i luga o faasalaga mo tagata o loo faaauau pea ona lē usitaia tuutuuga o loo sau ma le penefiti.
Puna o Faamatalaga: http://Social welfare changes: Government reveals tough new traffic light system for beneficiaries – NZ Herald
