E 26 meli la’upasese na afea Samoa i lenei tausaga o le a mae’a, ma o se fuainumela tele lea o ni meli ua aumaia tagata tafafao i i le atunuu i totonu o se tausaga pe a fua i nisi o tausaga ua tuana’i.
O le tausaga fou ua faamoemoe e 27 meli o le a aumaia tagata tafafao o le a asiasi mai i Samoa, e pei ona faailoa e le pulega o tagata tafafao mai fafo.
O le Aso Gafua o le vaiaso nei sa afea ai le uafu tele i Apia e le meli la’upasese mulimuli o lenei tausaga ma aumai ai tagata tafafao e silia i le 800, e ese ai le auvaa.
O le 300 o tulisi a le meli o le Vasco Da Gama sa tafafao i nofoaga eseese o le atunuu lea sa malaga i pasi, ae o le isi to’atele sa feoa’i solo i nofoaga eseese o le taulaga.
O le autalavou a le EFKS i Tanugamanono sa saunia faafiafiaga i le uafu i Matautu i Apia e faafeiloa’i ai pasese a lea meli.
E lua meli o le a afea muamua le atunuu i le masina o Ianuari o le tausaga fou, o le aso 21 ma le aso 30 o lea masina e afea ai Samoa e ia meli e lua e amata ai le 2025.
O le masina o Novema o le tausaga nei na afea ai e se tasi o meli le atunuu ma o le meli muamua lea ua taula i le taulaga o Apia mo le po atoa.
