O lea ua toe taliu mai i Upolu tamaitai e toalima o le a sailia le Tausala o le Pasefika ina ua mae’a le lua aso sa iai i le motu i Savaii, ma asiasia ai nisi o nofoaga o mataaga ma o loo faafailele ai foi nisi o a tatou tu ma aganuu.

O le afiafi o le Aso Lua na faia ai se tali faaaloalo mo tamaitai ma faailoa ai foi o latou lagona fiafia i le matagofie o tapenaga ma le taligamalo a Samoa.

O le ogatotonu o lenei vaiaso o le a afea ai e tamaitai le nofoaga o tamā ma tina matutua i Mapuifagalele i le mae’a foi ona latou asia le nofoaga faapea i Savaii.

O nisi o a latou polokalame faagasolo o le faia o a latou faataitaiga ma faatino foi le isi o vaega tāua o faatalatalanoaga i luga o auala o faasalalauga i leitio ma televise.

O se tasi o vaega tāua o tiute tauave faaiu o le Tausala o le Pasefika o loo umia nei le pale o le tausala sa tauaveina le pale o le Tausala Samoa le tamaitai o Fonoifafo, o le faaeeina lea iai o lona suafa matai o le Seumanu i le afioaga o Salelologa i Savaii.