E tusa lava pe toe solo tetee faiaoga o aoga maualuluga i le vaiaso fou, ae o faiaoga o aoga amata ma aoga tulagalua ua mautinoa e leai.
O le Aso Lulu o le vaiaso fou lea o loo ta’u e ono toe solo tetee ai faiaoga ma o lona uiga o le isi foi lea aso e leai ai ni aoga mo le toatele o fanau.
Peitai mai le New Zealand Educational Institute lea o loo fai ma sui o le silia ma le 45,000 o faiaoga ma puleaoga o aoga amata ma aoga tulagalua, o lea o le a le auai ai pe afai ae taunuu le solo tetee i le Aso Lulu o i luma.
O se tala fiafia tele lea mo matua o le toatele o fanauiti e aooga i aoga amata faapea aoga tulagalua ona o le toatele na aafia ai galuega i le vaiaso talu ai lea na misi ai le aso e tasi o aoaoga mo le toatele o fanau.
E oo mai i le taimi o tala fou e lei maua lava se maliega i totogi ma taiala o galuega a faiaoga a o faia pea fonotaga a iuni ma le matagaluega o aoga.
