E lata i le to’a 24 i tagata Samoa o loo galulue nei i Ausetalia i lalo o konekarate mo galuega faavaitaimi le RSE Programme lea ua ripotia mai le aafia i auga o le Koviti19 ao iai i ia atunuu.
Na faafesootai atu le Samoa Observer i nisi o tagata galulue faavaitaimi i Huonville i le setete o Tasmania ma na o latou taua ma faamaonia ua iai nei i latou i nofoaga faanofoesea poo ua iai nei isolation mo aso e 7 ina ua maua atu iuga o latou tests i le Aso Lua o le vaiaso nei. O se tasi foi o loo galue i totonu o le setete o Victoria ua lipotia foi le faamaonia lona maua i le faama’i.
Taua e se tasi o le au faigaluega faavaitaimi i Huonville e to’a 12 i latou i lea vaega o Ausetalia ua faamaonia le maua uma i le faama’i e ui o se tala faanoanoa peitai e le’o iai ni auga e iloa ai se tigaiga. Ua maea foi ona faailoa i aiga o i latou ua aafia ma o loo iai manatu popole.
Na faamaonia foi e se isi tagata faigaluega Samoa o loo i Melepone i Ausetalia e to’a 11 i latou ua faanofoesea ina ua maua atu iuga o a latou test o le Koviti.
Ua talosagaina ai e i latou nei le atunuu ina ia manatua pea i latou i talosaga ao taumafai ai e finau lea faama’i oti.
