Ua molimauina le matua’i faaleagaina ai o nisi o faaitu o Northland i tulaga ogaoga o lōlōga mai le loulouā tele o le tau, e pei ona fetaia’i ma ia nofoaga i le faai’uga o le vaiaso talu ai se’ia pā’ia mai le amataga o lenei vaiaso.
Na faamauina, le mamafa o timuga ma le tele o eleele solo ma le malolosi o savili, ma faata’uta’u matagi, na aafia ai lea faaitu o le atunuu.
Mātauina foi le faaleagaina ai o fale a nai tagatānuu i Ōakura ina ua lōlōvaia uma, ma na ta’ua e nisi o tagata e alaala ma pāpā’aao i lea nofoaga, na faamatala na oo lava le maualuga o le vai i o latou fatafata i totonu o le latou fale.
Ta’ua e le tineimū ma faalavelave tutupu faafuase’i le tele o valaau na oo atu mai aiga ua moomia le fesoasoani, ma na faapea foi ona tuu atu iai fautuaga a le auaunaga mo tagatānuu ina ia aga’i i nofoaga maualuluga.
Ma ona o tulaga mata’utia ua iai ma le to’atele o tagata e valaau atu i totonu mo fesoasoani o lea na fautuaina e le auaunaga tagatānuu e mau pea le onosa’i, ma e na o le pau le tulaga e ono oo atu ai se fesoasoani pe a oo i se tulaga mātuiā ma ma’ale’ale.
Na molimauina foi le faaleagaina o le Ōakura Community Hall i se eleele solo talu ai le malolosi o tafega ma le mamafa o timuga, ma e ta’ua le faatumulia ai o lea fale i le palapala; ae na māua le tafea ai o se vaega o se tasi o auala laupapa ma na molimauina le oo atu lava i itu lata ane i Whangaruru Harbour.
Ua faaalia le tuuina mai pea o fautuaga o timuga mamafa.
Puna o Faamatalaga: https://www.rnz.co.nz/news/national/584353/live-flooding-in-northland-isolates-communities-prompts-warnings
