E mae’a aso o le masina lenei o Fepuari i le Aso Toona’i o le vaiaso nei, sosoo loa ma le Aso Sa le ulua’i aso o le masina fou o Mati o le a amata ai le totogi fou o lafoga mo pasese uma e malaga ese ma Samoa mai o tatou malae vaalele faavaomalo.
O le taimi nei o le totogi o lea lafoga e 65 tālā, o le masina fou o le a 80 tālā.
O le a iai foi ma le isi totogi fou ua faailoa e le kamupani vaalele o le Samoa Airways e 100 tālā a le tagata e malaga ese mai ma Samoa; o lea totogi fou e mo le pulega o malae vaalele, ma e ta’ua lea tupe totogi o le Aerodrome Facility Charge.
O le siitaga 80 tālā o le lafoga mo pasese malaga ese ma Samoa faapea lea suiga fou i le 100 tālā e totogi o le a faailoa uma i pepa o le pasese e totogi poo le ticket.
O teuteuga o le tulafono faatonutonu a le pulega o malae vaalele o le tausaga lenei 2026 ua mae’a sainia e le afioga i le Ao o le Malo e pei ona faailoa e le Samoa Airways o loo mafua mai ai le siitaga o le lafoga mo pasese le airport tax ma le isi totogi fou e selau tālā.
