O le faaaogā ai o taavale e ola i le eletise i Samoa ona o se isi lea o lagolago i le faaitiitia o kasa kaponi e faaleagaina ai le ea, o se isi lea faaopoopoga i le eletise mana’omia i lo tatou atunuu.

E 76 taavale e ola i le eletise na aumai i Samoa i le tausaga na te’a nei i lalo o le poloketi mo le galuea’ina o ālafua mo le faaitiitia o aafiaga o fela’ua’iga i atumotu laiti e pei o Samoa, o se poloketi e fesoota’i ma suiga o le tau ma e faaigoaina o le Climate Action Pathways for Island Transport.

Ua tufa ma faasoa atu ia taavale e ola i le eletise i matāgaluega ma pulega eseese a le Malo, ae e lē o faailoaina mai i le pepa o faasalalauga poo ā ia pulega ma matāgaluega a le malo ua ave iai taavale.

Ae o taavale o ituaiga o SUV, o vans ma pikiapu.

Faaalia i le pepa o faasalalauga o le sini autū o lea poloketi o loo faatupe e le Malo o Iapani ae faaauala mai e le faalapotopotoga o atina’e a Malo Aufaatasi le UNDP ia faanatinati le faaitiitia o le pua’ina atu o kasa kaponi mai fela’ua’iga i le laueleele ma le sami.

O ia kasa kaponi mai taavaleafi ma vaa o loo iai mau a le ausaienitisi o le mafua’aga ogaoga lea o loo faatupula’ia ai le vevela o le lalolagi ma mafua suiga o le tau.

O faamaumauga lava ia o loo itiiti se sao o Samoa i le pua’ina atu i le vanimonimo ma le ea o ia kasa kaponi peitai e tāua le galulue faatasi ma taulamua atunuu o le Pasefika i le faaitiitia o ia kasa o loo pua’ina atu i le osone o le lalolagi.

E pei ona silafia o faaletonu ua aafia ai le auaunaga a le eletise i Upolu ona ua maualuga le tulaga mana’omia ae ua iai faaletonu i nisi o afi ma uaea malolosi i lalo o le eleele.

O se tasi lea o galuega ua silasila iai le faalapotopotoga o le eletise ia faaleleia auā o le itu mautinoa, a oo ane i se taimi ua tele taavale e ola i le eletise i Samoa, ua lava tapena lana auaunaga ma lē toe tutupu ai ni faaletonu e pei ona mafua ai ona tau faasoasoa le eletise i le motu o Upolu.