“Folau ma le Faatuatua “ o le sini autu lea o le atoaga o le Iupeli Taimane a Samoa poo le 60 tausaga talu ona saoloto mai i Pulega faakolone i tausaga e tele ua tuanai.
O se tausaga mataina le atoa ai o le 60 tausaga o le atunuu e lē gata i tapenaga a itumalo taitasi ae o le folauga na tauasa mai ai tuaa na taumafaia le saolotoga o le atunuu.
O le taeao nei i le Malae i Tiafau i Mulinuu sa omai faatasi ai le Ao o le Malo Sui Ao ma o latou masiofo, faapea le Malo o Samoa ma ona taitai e molimauina le sisi a’e o le tagavai o le atunuu. O le afioga i le Ao Mamalu o le Malo Tuimalealiifano Vaaletoa Sualauvi ll na saunoa i le saunoaga autu ma na ia faafetaia ai tuaa ua lagomau mai i Tiasā lea sa finau mo le tutoatasi o Samoa.
O le afioga i le tamaitai Palemia Fiame Naomi Mataafa ma tuu iai le faaaloalo na te sisi a’e le tagavai o Samoa. O se tulaga mataina auā e le’i tuumāmāina e itumalo taitasi tapenaga o le 60 tausaga o Samoa sa faatino lava a latou polokalame eseese e pei o le itumalo Palauli 2, Aiga i le Tai, Safata, Safotulafai ma le afioaga o Nofoalii.
E tele tulaga mataina o lenei tutoatasi e le gata o le 60 tausaga, o le tulai mai o le faigamalo fou ma le pale mai o le uluai tamaitai Palemia o Samoa.
