O le masina nei e atoa iai le 50 tausaga o le tautua a le Faaputugatupe mo le Lumanai Manuia o Tagata, le Samoa National Provident Fund i le atunuu ma o loo sauni le pulega i se tapenaga tele o lea faamoemoe taua.
Na faailoa e le Minisita o Tupe Mulipola Anarosa Molioo lea fuafuaga I se faatalatalanoaga ma le Samoa Observer. Ina ua fesiligia le Minisita o Tupe i tapenaga ma fuafuaga e ala i ni pasene e faimeaalofa atu ai i ona sui auai (members) e faamanatu ai lea aso faapitoa na tali Mulipola o le vaiaso nei o le a feiloai ai le pulega e talanoaina nei fuafuaga.
Na ia taua foi o fuafuaga uma mo lea faamoemoe o le a tuu atu i luma o le Kapeneta i le Aso Lulu o le vaiaso nei. Ua iloga le tautua a lenei pulega a le malo i ona tagatanuu ma o le a tālia nei poo le a se faamanuiaga o le a faamanatu ai le 50 tausaga o le NPF.
O le aofai atoa o sui o le faapotopotoga talu mai Oketopa 2016 e oo atu i le to’a 32,938 ma le 26% mai le public sector ma le 74% mai le private sector. O le aofaiga atoa o le aufaigaluega a le NPF i le taimi nei e to’a 1,653.
