O loo faagasolo nei i lo tatou atunuu ni faatalatalanoaga o loo auai atu iai sui o auaunaga ma tautua, e fesoota’i i le faaleleia o a’oa’oga.
O loo autu ia faatalanoaga i le tuufaatasia o se manatu o Samoa e tuuina atu i le fono a Malo Aufaatasi e usuia i le masina fou i le aai o Niu Ioka i Amerika, o le a sailia ai ni auala e fofo ai tulaga faaletonu ua aafia ai le ola a’oa’oina o fanau, e mafua i aafiaga o le faama’i Koviti-19.
Ua faaalia i faamaumauga o le faama’i, e tusa ma le 48 miliona itula ua lē maua ai e fanau a’oa’oga e mafua i aafiaga o le Koviti-19, ma o le tasi lea o autu o le aoao mai o se manatu o auaunaga eseese tau a’oa’oga i Samoa e faufau ai se lavea’i mo le toe siitia o le olaga a’oa’oina o fanau e lē gata i Samoa, ae o atunuu o le lalolagi ua laugatasia i aafiaga tau a’oa’oga e mafua lava i le faama’i.
O le Aso Lua ma le Aso Lulu sa faagasolo ai ia faatalanoaga i Upolu ae faamae’a i Savaii i le Aso Tofi ma le Aso Faraile o le vaiaso nei lava.
