O lea ua faalauiloa se faamatalaga a le Auckland Transport i le asō e faapea e 475 tagata e ana fale o loo iai i vaega ia ua fuafua e aafia i le auala lea ua fuafuaina mai Botany i le malaevaalele i Aukilani ma ua maua tusi a nai tagata ia e tusa ai o lea galuega. 

Fai mai o nisi o i latou ia ua faailoa iai e ao ona faamatuu o latou fale mo le fausia o lenei poloketi.

O le mataupu lea sa lipotia atu foi e talafou i nai masina ua tuanai sa faaleo ai le lē fiafia o le toatele o i latou e aumau i le vaipanoa lea e pei ona fuafuaina ai le auala ona o le faateia i nei fuafuaga ma lē fiafia iai, ua o latou tusi atu i le Auckland Transport faapea foi ma faipule ma le Palemia ina ia taofia le poloketi ma talosagaina le faia o se fonotaga i le mataupu lea.

Ua faailoa i lipoti a le Herald e talitonuina o le aoauli o le asō sa fuafua ai lea fonotaga i le Puhinui Station i le tea o le fā.

O faamatalaga a se tasi o sooupu a le Auckland Tansport ua ta’ua ai e le o iai se faaputugatupe e faagaioi ai le poloketi mo le taimi nei ma o le mataupu foi i fale e pe a ma le 2-5 tausaga faatoa oo atu i le vaega e aafia ai fale faatoa amata ai le galuega o lona uiga masalo poo le isi 10-15 tausaga faatoa faagasolo.