Ua lomia nei iuga o suega o le NCEA sa faia i le masina o Setema, ma ua iloa ai e silia ma le selau afe tamaiti aoga na o latou su’eina tasi o pepa su’ega ua o latou filifilia mai le itu o le faitautusi, tusitusi ma le numera poo le matematika i lona faagasologa lona lua o ia suega i totonu o le tausaga, e pei ona faatino i le masina o Me ma Setema; ae silia ma le 80 afe tamaiti na sue i mataupu taitasi.
O a latou maka pei ona faailoa e le RNZ e 55 pasene na pasi i le numera, 66 pasene na pasi i le tusitusi ma le 70 pasene na pasi i suega o le faitau tusi. O le tulaga e iai e tatau ona pasi uma suega e tolu faatoa mafai ona maua se qualification mai le NCEA.
Ua faailoa i le lipoti lea e toeitiit o lei ‘afa o tamaiti na taumafai ia pasi mataupu o le numera i le NCEA na faamanuiaina a latou suega. O isi faamatalaga o lea lipoti mai le Qualifications Authority ua tā’ua ai o lipoti mai mataupu e pei o le faitautusi ma le tusitusi ua faailoa ai o i latou e le’i pasi mai ia suega sa iai le faalētonu i le mulimulita’ia o faatonuga mai le suega ma e toatele foi tamaiti e manaomia ona faaleleia le proof reading ma le editing poo le toe iloilo ma siaki a latou pepa su’ega ina ia mautinoa o loo sa’o ma atoatoa lelei le sipelaina o upu, o lona faaleoina atoa ai ma le faaaogaina o mata’itusi lapopoa, capital letters.
Fai mai le peresetene o le asosi o pule aoga, Secondary Principals Association Vaughn Couillault o iuga o suega nei ua iloa ai sina vaega ua alualu i luma improvement i le faitautusi ma le tusitusi talu mai le 2023 ae o loo iai pea se tulaga faapopoleina i le mataupu o le matematika.
Ua faailoa foi e le alii peresetene e eseese uma le silasila a tagata i le mataupu lea ona e iai aoga e pei o lana aoga e 1,600 tamaiti aoga, ae o le 400 o lea aofai o tamaiti o le latou gagana lona lua le faaperetānia ma o le mafuaaga lea e afua ai ona faafaigata ona pasi isi ona o le taimi e faamasani ai tamaiti i le gagana.
Puna o Faamatalaga: https://www.rnz.co.nz/news/national/535821/45-percent-of-ncea-students-fail-this-year-s-online-literacy-numeracy-tests
