Ua silasila nei le matagaluega o mataupu tau lotoifale a le malo o Niu Sila e a’oa’oina lelei tagata faigaluega i le ofisa o le Komesina Maualuga o Niu Sila i Samoa i le faia o talosaga mo sitiseni o tagatānuu o Samoa e agavaa i lea faamanuiaga i aiaiga o le tulafono o le sitiseni o tagata Samoa i Niu Sila lea na pasia e le Palemene a lea malo ia Novema o le tausaga ua mavae.
Ua faailoa e se ofisa sinia o lea matagaluega i se lipoti a le leitio a Niu Sila e silia i le 400 tagatanuu o Samoa i latou na soifua mai i le va o le tausaga e 1924 ma le aso muamua o Ianuari o le tausaga e 1949 ua maua o latou sitiseni Niu Sila.
O le a’oa’oina o tagata faigaluega i le ofisa o Niu Sila i Apia o le a mafai ai ona tagofia talosaga mo lea sitiseni i lo tatou atunuu e aunoa ma le tau lafoina i Niu Sila e faia ai, e pei ona faatino i le taimi nei talu mai Novema o le tausaga ua mavae.
O loo iai le talitonuga e agavaa mo lea tagatanuu Niu Sila o tatou tagata e tusa ma le 3,500 ma o le to’atele ua oo le matua o le soifua i le 75, 80 ma sili atu.
O nisi o loo mafai ona malaga i Niu Sila a o nisi ua faatūtūgatā ona o gasegase ma le tulaga o le matua o le soifua ua lē gafatia le malaga i le vaalele.
