E 40 aiga mai le 23 afioaga i totonu o le atunuu ua faamanuiaina i laau totō e tauala mai i le fesoasoani tupe a le Malo o Ausetalia ma Niu Sila ua ta’ua o le PHAMA Plus.
O lenei faamoemoe o se fesoasoani foi lea i tina ma tamaitai i le iai o lo latou sao i atina’e a le atunuu.
O le sui a le faalapotopotoga o Aiga Maaleale ma le Organic Mothers on New Earth, Sili Malaeolela Valerie Saena na ia faailoa, o le sini autu lava o lenei poloketi ia lagolagoina ai le taumafai o tina ma tamaitai i le itu tau i le atina’e.
“O le manaoga lava ia avea le au fai laau e amatalia ai se atina’e e maua ai tupe e tausi ai aiga ma fanau.
“O le tele o laau ia e taumafai e auina mai o laau lava o loo maua iinei ae peitai e le o tele lo latou ituaiga e pei o le oketi.
“A taunuu mai laau nei ona tufa loa lea i nai tina ia ua faamanuiaina e totō ina ia fua tele ona faatau lea.
Ta’ua e Sili a silasila i le tau o laau nei o loo faatauina ai e fai lava si taugata.
“E pei o le fala lea ua soo ai togalaau o aiga, i le taimi na lauiloa ai lenei laau e silia ma le $400 le tau i le laau e tasi o le ala lea e aogā ai le fai o laau nei auā e tele le tupe e maua ai.
“Ia lava foi le sapalai o laau nei auā e lei taitai ona lava, aua o loo faaaogaina e faletalimalo, o teuga falesa ma isi faamoemoe o loo manaomia ai.
Ua toatele tina o loo faapea ona manaomia lenei fesoasoani ae peitai na saunoa Sili o loo usitaia lava le fuainumera o avanoa o loo tuuina mai e le polokalame o loo gafa ma le fesoasoani.
“O loo iai le lisi faatalitali mo tina ua faaulu mai lo latou fia auai i lenei faalapotopotoga ae peitai ua tele lava le alofa ia ae peitai e na o le 40 avanoa.
“O latou la lea e i le lisi faatalitali ia e tālia foi le Vaega lona lua o lenei poloketi mo latou avanoa.”
O loo iai le fuafuaga a ola lauusiusi ma tele le atina’e o nei laau ona mafai lea ona faatauina atu i Amerika Samoa.
