Ua faailoa lautele mai e le Lakapi Samoa lo latou agaga faagaeetia ma le faafetai i le tuuina atu o le lagolago a le pulega ma le faletupe o le Samoa Commercial bank i le atinae o lakapi aemaise o tapenaga i le taligamalo i le taamilosaga o loo faagasolo nei o le World Rugby Pacific Challenge lea o loo tausinio ai ma le ‘au o le Manuma Samoa.
E $40 afe tala le lagolago a lea faletupe ua tuuina atu i le Lakapi Samoa, o le pulega lea o loo faafoeina le atinae o le lakapi i le atunuu.
Ua ave ai le faafetai a le Ofisa Sili o le lakapi Samoa i le pulega o le faletupe ona o le lagolago e lē o aveesea pea mo le unaia o le atinae o le taaloga lenei i Samoa aemaise e faatini uma faamoemoega o lea lagolago i le ausia o se tulaga maualuga o le atinae o le lakapi auā tausinioga faavaomalo.
Faaalia e le Pule Faatonu o le Samoa Commercial Bank le afioga Lemalu Ray Ah Liki, o le sini o le lagolago o le faatamaoaigaina o le ola ma le soifua o tagata e ala i le atinae o taaloga aemaise le lakapi o se tasi o taaloga o loo avea pea ma avefu’a mo Samoa i le lalolagi.
O le tasi o sini o le lagolago a lea faletupe e pei ona faailoa e le alii Pule Faatonu, ia unaia ai le atinae o taaloga i olaga o tupulaga lalovaoa o le atunuu.
