E $4.7 piliona le vaegatupe lea ua fuafua le faigamalo a le Feterale poo le faigamalo o loo tula’i mai i le taimi nei, e faatino ai ana fuafuaga e tali atu ai i sauāga i aiga ma sauāga e patino i ituaiga o tagata.

O le alii Palemia, Anthony Albanese na ia faailoa lea faamatalaga i le asō ma o le faatupega lea i totonu o le 5 tausaga o le national plan.

O se fonotaga sa faia a le Kapeneta i le taeao analeila ua lipotia sa faailoa ai e le Palemia vaega e fā e taula’i iai le fuafuaga, o le lagolagoina o i latou e pito i luma i le auaunaga, frontline services, taofia o i latou e faatino sauāga mai le toe faatino pea, o le saunia o le lagolago mo i latou talavou e aafia i sauāga atoa ai ma le silasila i le aafiaga o le ‘ava malosi i sauāga.

Fai mai le Palemia ua malamalama uma o le mataupu lenei e aafia uma ai le atunuu ma e mana’omia foi se tali fai faatasi a le atunuu i lea mataupu.

Saunoa Albanese e tatau ona faamautu le saogalemu o tamaitai ma ua tatau ona faamuta soifua ua ma’umau mai sauāga ma e lē na o le malo e gaioi ae mana’omia le gaioi foi o vaega uma o le sosaiete o tagata.

Mai le vaegatupe tele ua folasia, o le $3.9 piliona o le a faatupe mai e le faigamalo ma le vaega o totoe e faatupe e setete ma teritori o Ausetalia.

Puna o Faamatalaga: https://www.9news.com.au/national/domestic-violence-package-national-cabinet-anthony-albanese/3fcfecb2-54af-4e3d-9bf5-02a0083e4eba