Ua iai se faatatau e ono maua se aofa’iga e 3,500 poo le sili atu foi o le aofa’iga o tagatānuu o Samoa e agavaa i le sitiseni Niu Sila, ina ua amata faamamalu i le Aso Lua o le vaiaso nei malosi’aga o le tulafono o le sitiseni o tagata Samoa na soifua mai i le va o le aso 13 o le masina o Me o le tausaga e 1924 ma le aso muamua o Ianuari o le tausaga e 1949.

O lea aofa’iga o tagatānuu Samoa e agavaa ua faailoa e le sui o le Malo o Niu Sila i Samoa poo le Komesina Maualuga o Si’alei Van Toor i se pepa o faamatalaga mai lona ofisa i Apia, ma ia faailoa ai o le faagaioia o talosaga mo i latou uma e agavaa, e vave e lē pei o le faagaioia o isi talosaga mo le sitiseni Niu Sila.

E lē o faailoaina e le Komesina Maualuga poo le ā le vave e faagasolo ai le tagofia o se talosaga ona maua lea o le sitiseni.

I se faasilasilaga a le vaega o femalagaa’iga i le ofisa o le Komesina Maualuga i Apia o loo faailoa ai e tele talosaga i lalo o le tulafono teuteu o le sitiseni Niu Sila o tagata Samoa o le tausaga e 1982 ua amata ona faagaioi, ma ua fautuaina ai le atunuu e leai se taimi e faamuta ma faagata ai le avanoa e tuuina atu ai talosaga.

Ua faailoa ai e le vaega o femalagaa’iga a Niu Sila tuatusi o ana upega tafa’ilagi e mafai ona maua ai faamatalaga uma o pepa talosaga ma tagata e agavaa.

Ua fetaui le amata faamamalu o aiaiga o le tulafono teuteu o le sitiseni Samoa o le tausaga e 1982 ma le tumutumu o le ofisa o femalagaa’iga a Niu Sila i lo tatou atunuu ia i latou o loo fia talosaga ni visa e malaga ai mo fuafuaga faavavave faaleaiga poo pisinisi ma ni fonotaga faaopoopo iai ma le autafafao o le Kerisimasi ma le Tausaga Fou.