$35 miliona o loo puipuia ai le NPF mai le nonogatupe 13 miliona a se ekalesia

April 7, 2025
Samoa
Tusia: Galumalemana Autagavaia Tipi Autagavaia

646

Ua faailoa lautele e le ta’ita’ifono o le faalapotopotoga o le faaputugatupe o le lumana’i manuia o tagata le NPF, le susuga Papalii Tavita Moala, mafua’aga na talia ai e le Komiti Faatonu o lea faalapotopotoga tuma’oti tau tupe a le malo le nonogatupe e 13 miliona tala a se ekalesia, ua lē mafai e le ta’ita’ifono ona ia faailoa le igoa o le ekalesia ona o aiaiga faaletulafono.

E $35 miliona tala le puipuiga poo le security o le tau o ni aseta a lea ekalesia ua tuuina atu e faamauina ai le latou aitalafu e pei ona faailoa e Papalii Panoa i se faatalanoaga ma le vaega faasalalau o le Talamua.

O lea security e 35 miliona e aumai i le aseta o se fanua ma se faletalimalo i Vaitele, faapea le malumalu tapua’i ma le fanua foi o lea ekalesia i le taulaga i Apia.

O le finagalo o le ta’ita’ifono ua tali ai i se faasalalauga a le ta’ita’i o le Itu Agai ma lana vaega faaupufai ua faailoa ai le igoa o le ekalesia ma le aofa’iga o lana aitalafu i le NPF.

Le ta’ita’ifono o le Komiti Faatonu o le NPF le susuga Papalii Panoa Tavita Moala i le faatalanoaga ma le Talamua.

Ae i le faailoa ai e le ta’ita’ifono o lea faalapotopotoga o le NPF o sona finagalo i le mataupu i le nonogatupe a lea ekalesia, o le faai’uga o le vaiaso na aumai ai le tusi i le faatonu a le ta’ita’i o le Itu Agai, ua ia fautuaina ai le ta’ita’ifono o le vaega faaupufai o le Faatuatua i le Atua Samoa ua Tasi, e toe faafoi le meaalofa tupe e 200 afe tālā na latou maua mai lea ekalesia, e totogi ai le nonogatupe i le NPF.

O lea foa’i tupe na faia e le ekalesia ona o se talosaga mai le vaega faaupufai e pei ona faailoa e le ta’ita’i i se feiloa’iga ma tusitala.

Ae i le nonogatupe e 13 miliona, o loo ioe le ta’ita’ifono o le NPF i le talanoaga ma le Talamua, o loo iai tupe tuua poo arrears o le nonogatupe.

Peitai ua talia e le Komiti Faatonu le talosaga a le ekalesia e tuu atu se taimi, se’i mae’a se mataupu tau faamasinoga faalotoifale a lea ekalesia, ona matala lea o teugatupe a le ekalesia aoao o le a mafai ona toe faaola ai seleni ua tuai ona togitogi o lea aitalafu.