E le’i mae’a le masina fou o Fepuari ua tatau ona faatino se fuafuaga fou a le malo o le tufatufa o le vaegatupe e 32 miliona 250 afe tālā e fesoasoani ai i tapenaga o a’oga a le fanau uma i le atunuu.
Ua faailoa lea fuafuaga e le ta’ita’i o le malo le afioga i le Palemia i le tatalaina o le fono a faia’oga uma i le atunuu sa usuia i le Aso Gafua o lenei vaiaso, a o lumana’i le toe a’e o fanau mo a’oga o lenei tausaga.
Ua fuafua le malo e faaauala atu lea fesoasoani i komiti o Fono Faavae a itumalo palota uma e 51.
Le afioga i le Palemia susuga Laaulialemalietoa Leuatea Polataivao Fosi i le tatalaina o le fono faaletausaga a faia’oga uma o le atunuu o loo faagasolo i lenei vaiaso.
