Faasilasila mai e Ausetalia o le a latou faatagaina tagata e faimalaga atu i le atunuu mo galuega faavaitaimi (seasonal workers) ina ia avatu uma ma o latou aiga. O le fuafuaga lenei a le faigamalo fou le Labour, ina ia faatino ai le latou ālafua fou ina ia talia le to’a 3,000 tagata mai aiga o le Pasefika, e mafai ona ulufale i le atunuu ma faagasolo le mauaina o visa nofomau i totonu o tausaga taitasi.

O le malaga atu i Fiti a le tamaitai Minisita o le Va i Fafo a Ausetalia, Penny Wong i le faaiuga o le vaiaso talu ai, na ia saunoa ai ma faasilasila i le Pacific Islands Forum Secretariat, ua tele tausaga o fesoasoani pea tagata mai Atumotu o le Pasefika i le tapu’eina ma le faataatiaina o le agaifanua a Ausetalia.

Ta’ua e Wong le matuā talisapaia e Ausetalia o le sao o tagata Pasefika o loo faia i totonu o le atunuu, lea ua silasila ai le malo i nisi auala e faaauau ai pea na sootaga.

Ma e mananao le faigamalo ina ia faamautinoa o loo lelei ma tonu le auala o loo tausia ai tagata Pasefika e agai atu e galulue i totonu o Ausetalia, lea ua faataga ai tagata e agai atu e faigaluega i totonu o Ausetalia, ma avatu foi ma o latou aiga. Ma o le a saunia ai se visa mo na sootaga ma tagata Pasefika, ina ia maua le 3,000 o tagata Pasefika e mafai ona nonofo mau i Austalia i tausaga taitasi.

I le lua tausaga talu ai, ua mae’a ai ona faagasolo lena polokalame mo tagata faigaluega faavaitaimi mai le Atu Solomona. E silia ma le 3,000 tagata mai lena atumotu o loo faigaluega i setete eseese o Ausetalia i lalo o le polokalame lena o tagata galulue faavaitaimi.