O fuafuaga a le Malo i le siitia o soo se vaega o le atina’e o le tamaoaiga, i le itu i faatoaga ma faigafaiva, o aoaoga ma le soifua manuia o tagata, ua faailoa lautele ai e le taitai o le Malo nisi o faaiuga a le Kapeneta, e pei o le faatauina mai o le 30 masini faamamā toto e fesoasoani i le togafitia o gasegase o fatuga’o lea ua molimauina le toatele o tagata ua aafia ai, ma ua oo lava i nisi o fanauiti.
Ua iai foi le faaiuga e toe fausia se tasi o nofoaga i Salelologa i Savaii sa avea ma falepopo o le Malo, e avea ma nofoaga e tapena lelei ai oloa mo le auina i fafo.
O se tasi o taumafaiga a le Malo ia saga faaleleia le tulaga o oloa tau faatoaga ina ia tausisia ai aiaiga o oloa o loo faatau atu i Niu Sila.
Ua faailoa foi e le tamaitai Palemia e toa 40 fanau ua faamanuiaina i avanoa sikolasipi mo Niu Sila ma Fiti e totogi e le Malo, ma a itiiti mai e faaaluina ai se vaegatupe e tasi le miliona 3 selau afe tala Samoa.
O lea aofaiga o fanau ua aooga ai i Fiti le toa 29 ae 11 i Niu Sila. Ua iai foi fanau ua mau avanoa i sikolasipi i le atunuu o Saina, o Iapani, Peretania, ma Ausetalia, ae o loo faaauau foi ona fesoasoani le Malo i le faatupega o avanoa sikolasipi mo nisi o fanau o loo aoaoina i le Iunivesite Aoao o Samoa, ma le Iunivesite o le Pasefika i lo tatou atunuu le Samoa Campus.
