Ua tauaao nei e le pulega o le Iunivesite Aoao a Samoa le foai tupe na maua i se sailiga seleni i Niu Sila i le faamoemoe e faatau ai se pasi mo fanau aoga a le Iunivesite i lo tatou motu o Savaii.
E 17 afe na maua i le aao mafola o nisi sa lafo tupe i se taumafataga ma le leitiofoni, ma le 3 afe na foa’i e le kamupani o le Pacific Ezy Money Transfer, ona maua ai lea o le 20 afe tupe Niu Sila na lafo mai i le amataga o le vaiaso nei mo lea faamoemoe.
E silia i le 32 afe tupe Samoa na maua i lea agalelei ae oo mai i le taimi ua auina atu lenei lipoti, e lei faailoaina mai e le Iunivesite se isi faaopoopoga o seleni na maua i le leitiofoni i Samoa faapea foi ma le tupe i Niu Sila.
Utumou’u Henry Soagia: “Ua faatupe ma faatū e le Malo le faleaoga. Ua uma foi ona iai lona faatotogaina o le faleaoga e ala i faiaoga. Ia ae mo le faamanaia atiliina o le manatu ina ia faafaigofie mo alo ma fanau, tai pei o i lea sa tata’i aga’i iai se tofa foi i le pulega, i se latou lava ia taga’i, lē faamoemoe foi i le malo, ae taufai galulue uma itu e lua. Galue le malo i le vaega faigata, lapo’a ma le ata lapo’a o le faamoemoe, ae galulue foi faiaoga faatasi ma mātua, auā se faamalosiina o le faigapaaga lea a le faigamalo faatasi ma aiga, ae patino tonu lava ia i latou o loo iai i totonu o le aoaoga i lea taimi. Tai pei e faapea se autilotilo aga’i i ai, ae o le fesili lena sa tau mategata ona e le’i faigofie, i le faigata o le soifuaga Autagavaia iinei i Niu Sila nei. E vaaia ai ma faafetaia le agalelei o le Atua i nai o tatou tagata, ona e tiga lava ona iai le fesili lena, ae le’i taofia ai le naunau mai lava e togi se maa.”
Se finagalo o le ta’ita’ifono o le komiti i Niu Sila sa tapenaina le suegatupe mo se pasi a fanau o le Iunivesite aoao a Samoa i Savaii, le susuga Utumou’u Henry Soagia.
O sui o lea komiti o Mailata Tony Sui o le sui ta’ita’ifono, Nou Matautia o le failautusi, Rasela Tauiliili o le teuoloa, Faga Siilata o le Faatina o le lagolago autu foi o le faamoemoe ma o le pule o le Talimanao Catering, ma le afioga i le Konesula o Samoa i Aukilani le susuga Faolotoi Reupena Pogi.
