O se alii Niu Sila, e 31 tausaga lona matua, na maua a o taumafai e aumai faananā se uta e silia ma le 800 kilokalama o le cocaine i Ausetalia, ua falepuipui nei mo le 26 tausaga ma e faato’ā mafai ona talosaga mo le palola pe a uma ona tuli le 17 tausaga o lena faasalaga.
I se lipoti a le ABC, ua ta’ua ai le ioeina e le alii o Tamaohungia Joseph Tepatu-Edwards, o lana solitulafono o le aumai faananā o lea fuālaau faasāina ina ua tula’i i le Supreme Court i Western Australia i le Aso Faraile talu ai.
O Tepatu-Edwards na faasee atu lona aiga i Ausetalia ma nonofo ai a o pepe o ia, ma na ta’u ane iai e le faamasino, Justice Amanda Forrester, e mautinoa o le a toe tipoti mai i Niu Sila i le taimi lava e toe magalo ai.
Na ta’ua i totonu o le faamasinoga, o le tausaga e 2023 na maua ai Tepatu-Edwards o galulue faatasi ma isi tagata e avatu se vaa e avane iai se uta tele o fuālaau faasāina mai se vaa la’uuta tetele, le ST Pinot, a se faalapotopotoga tele o loo faatauina fuālaau faasāina.
Sa finau le loia na tula’i mo Tepatu-Edwards, e leai se faamaoniga maumaututū o le aafia o lana client i le soligatulafono matuiā, e ui sa faitau i totonu o le faamasinoga mea na aafia ai Tepatu, e pei o lona fesoasoani e faatau le vaa lea na faaaogā, ma isi mea e pei o moliuila e faailoilo ai i le vaa tele le mea e faapa’ū ifo iai le uta, ma sapelu (tulou) e sesele ai maea.
Sa ta’ua foi e le loia e ui lava o Tepatu-Edwards o se sitiseni Niu Sila, ae ua matuā lē toe iai ni ona sootaga i Niu Sila auā na malaga ese atu ma ona mātua i Ausetalia a o pepe.
Ae na saunoa le faamasino, e ui e lē matuā malosi se sootaga a Tepatu-Edwards i soligatulafono matuiā sa fai, ae sa avea o ia o se tagata sa tāua ma faamoemoeina i le faalapotopotoga mo fuālaau faasāina, ma o lana filifiliga lena sa fai, ina ia auai.
